%20en%20Threads3.png){kind=small}
A praza de María Pita contará cunha pista de xeo e diferentes atraccións
para nenos e nenas
A Coruña, 21 de novembro de 2023.- A Coruña contará este ano con máis de tres millóns de
puntos de luz de Nadal, que se iluminarán a partir do vindeiro venres 1 de decembro, nun
acto que terá lugar, como xa é costume, no Obelisco. Haberá nos diferentes barrios e distritos
560 arcos luminosos e toda a iluminación será de baixo consumo.
O acto que terá lugar no Obelisco estará presidido pola alcaldesa, Inés Rey, que destacou a
importancia de que “o Nadal se viva coa mesma ilusión e intensidade nos diferentes barrios
da cidade”. “Como cada ano, estas son datas de grande ilusión, sobre todo para a mocidade
e o noso comercio, polo que animo a cidadanía a facer as súas compras de Nadal en negocios
de proximidade”, indicou. As luces distribuiranse por diferentes rúas dos barrios e primarán
os espazos comerciais abertos para fomentar as súas vendas. Ademais, A Coruña volverá
contar coa grande esfera luminosa de 12 metros de altura da Mariña e coa árbore de 20
metros de altura do Obelisco.
O 1 de decembro o acto de acendido comezará ás 18.30 horas. Previamente, haberá
animación infantil no Obelisco e, para rematar, unha actuación de Sisters in the House.
Ademais, o mesmo día comezarán tamén as actividades de Nadal da praza de María Pita,
que inclúen este ano unha pista de xeo de 30x20 metros. O seu horario de apertura, que se
prolongará ata o 7 de xaneiro, variará en función do período do mes: en período escolar a
apertura será, de luns a xoves de 16.45 a 21.30 horas, os venres de 16.45 a 22.15 horas e
os sábados, domingos e festivos de 11.00 a 23.00 horas; durante as vacacións de Nadal o
horario será, de luns a domingo, de 11.00 a 14.00 e de 16.00 a 23.00 horas e os días 24 e 31
de decembro será de 11.00 a 18.00 horas e o 25 de decembro e o 1 e 6 de xaneiro, de 18.00
a 22.45 horas. As sesións serán de 30 minutos e o prezo xeral será de 9 euros e para centros
escolares de 3,5 euros, patíns incluídos.
O resto de actividades de Nadal, que tamén comezarán a partir do vindeiro 1 de decembro,
serán anunciadas en próximos días, incluindo opcións para todos os públicos nos diferentes
barrios da cidade.
A Casa dos Xoguetes
A oficina, situada no número 9 da praza Mestre Mateo, estará aberta entre o 1 de decembro
e o 5 de xaneiro, permitindo a aquelas persoas interesadas entregar xoguetes en bo estado
de conservación. Os xoguetes que se recollan terán que cumprir coas normativas europeas
para o seu uso e estarán destinados a nenos e nenas de ata 14 anos. Aceptaranse un máximo
de 10 xoguetes entregados por usuario ou usuaria.
A campaña levada a cabo polo Goberno de Inés Rey ten como fin contribuír a fomentar un
consumo responsable entre a cidadanía, alongando a vida útil dos obxectos dun xeito
solidario e desinteresado, que axuda tamén a reducir o volume de residuos xerados na
cidade. Os horarios de apertura da Casa dos Xoguetes serán os seguintes: de luns a venres
das 10.00 ás 19.00 horas e sábados de 10.00 a 14.00 horas. No tríptico adxunto pódense
atopar, ademais, unha serie de actividades para nenos e nenas que se desenvolverán neste
espazo.
