%20en%20Threads3.png){kind=small}
As actuacións, xunto ás de Scorpions e Marea, serán no peirao de Batería
no mes de xullo
A Coruña, 31 de maio de 2023.- Este xoves, 1 de xuño, sairán á venda as entradas para os
concertos de Rubén Blades e ZAZ, que forman parte do ciclo de actuacións musicais
Coruña Sounds, que promove o Concello da Coruña a través do IMCE. A venda estará
activa a partir das 11.00 horas tanto a través de Ataquilla como no despacho de billetes da
praza de Ourense. As entradas non son nominativas e pódense comprar un máximo de 10
por persoa. Toda a información está dispoñible na páxina web www.corunasounds.es.
Rubén Blades e ZAZ únense a Scorpions e Marea dentro do ciclo Coruña Sounds, que terá
lugar no peirao de Batería durante o mes de xullo. O Goberno de Inés Rey crea esta nova
iniciativa musical co obxectivo de abrir o porto á cidadanía e dinamizar a oferta cultural e
musical do verán coruñés. Durante o mes de xullo pasarán polo peirao agrupacións
nacionais e internacionais de gran prestixio e de diferentes estilos musicais.
O concerto de Rubén Blades será o 20 de xullo. O máximo expoñente da salsa a nivel
mundial actuará xunto á Big Band de Roberto Delgado, composta por case 20 músicos. O
panameño conta cunha carreira sobresaínte de máis de cincuenta anos, nos que colleitou
numerosos éxitos e recoñecementos. É considerado un dos máis grandes artistas latinos do
século XX e conta entre os seus recoñecementos con 10 premios Grammy e outros 13
premios Grammy Latinos. As entradas para o seu concerto costarán 35 euros.
Pola súa banda, ZAZ actuará o 31 de xullo no mesmo escenario, dentro da súa xira
‘Organique Tour’. O seu pop enche recintos en toda Europa e actuará por primeira vez na
cidade. As entradas para a súa actuación custarán 25 euros.
Xa están á venda as entradas para os concertos de Scorpions (13 de xullo) e Marea (22 de
xullo). Ambas as formacións son unha referencia absoluta dentro do xénero do heavy metal
e do rock estatal.
As actuacións no porto coruñés durante o verán completaranse a fin de
semana do 28 e 29 de xullo coa programación do Morriña Festival, que contará nesta
edición coa presenza de destacados artistas internacionais de diferentes xéneros como
Nicky Jam ou Two Door Cinema Club. Na mesma localización terá lugar en setembro o ciclo
de concertos Noites do Porto, que xa confirmou os seus dous primeiros artistas: Deluxe e
Sen Senra. O Concello promove todos estes eventos.
