%20en%20Threads3.png){kind=small}
Na última xornada do festival celebrarase un encontro entre público e cineastas
Este sábado, un xurado formado por representantes de entidades sociais,
medios de comunicación, a universidade da Coruña e o concello, elixirán a
mellor curtametraxe das once seleccionadas para esta primeira edición do
festival de cine LGTBIQ+, Norte Cinema Diverso. O traballo máis votado
recibirá o premio Marieta, un zoco de madeira obra da artista coruñesa
Elena Ferro.
A xornada comezará ás 12,00 do mediodía cunha sesión de portas abertas
no teatro Colón para gozar de media ducia de aspirantes ao premio
Marieta. A organización convidou ao alumnado de centros escolares da
cidade coa intención de “abrirnos a públicos novos para que coñezan as
nosas realidades e loitemos entre todos e todas contra as fobias”, dixo
Fernando Cayazzo, codirector do Norte Cinema Diverso.
A sesión da tarde comezará ás 17,00 horas cun encontro entre cineastas e o
público da Coruña. Participarán neste coloquio Carla Antonelli,
protagonista de Triángulos rosas; João Maia, director de Variações;
Richard Zubelzu e Magda Calabrese, productora e director de Yo soy una
niña; Vicky Calavia, directora de Abriendo ventanas e Andrea Beade e
Quiela Nuc, directoras de Una dedicatoria a lo bestia.
Triángulos rosas e Variações proxectaranse na sesión das 19,00 horas e das
21,15 horas, respectivamente. No medio, anunciarase a curtametraxe
gañadora do premio Marieta.
O Norte Cinema Diverso está organizado pola asociación Palestra, a
filmoteca da fundación Pedro Zerolo e o concello da Coruña. As entradas
poderanse retirar a un prezo de tres euros por sesión na web do Colón ou
no despacho de billetes do teatro. A asistencia á xornada matinal é de
balde.
