%20en%20Threads3.png){kind=small}
[Escoita "A feira das mentiras" aquí.]
«Porque en Galicia nós somos a calidade / e Boyanka patrimonio cultural dá humanidade»
‘A feira das mentiras’ é o segundo adianto do novo álbum de Boyanka Kostova, o dúo santiagués formado por Cibrán García e O Chicho do Funk -Ortiga-; os pioneiros do trap galego. Chega tras a publicación, apenas hai un mes, de ‘ORDOÑO’, e ambos os temas son unha declaración de intencións de todo o que está por vir; que será ademais o seu primeiro traballo publicado baixo o selo de Ernie Records.
«O meu rap é unha bala directa cara o teu peito /
O beat este deixoume toda a noite a papar teito /
Algo ó que non estou afeito /
Eu sei que non coñeces un rapaz con tanto xeito»
En ‘A feira das mentiras’, Boyanka Kostova é puro hip-hop; cunha melodía inicial que nos toma da man e vainos guiando pola canción ata que a base rompe; entón, chega a rima: «porque en Galicia nós somos a calidade / e Boyanka patrimonio cultural da humanidade», sentencian.
Pegadiza, cunha métrica coidada e afinada, ‘A feira das mentiras’ supón un salto de calidade para o dúo galego responsable do maior crossover do trap en España. Tras xogar e experimentar anteriormente con todos os sons e xéneros -funk, muiñeira, música urbana, electrónica, trap…-, en ‘A feira das mentiras’ apostan por un rap elaborado e de calidade no que non faltan numerosas referencias.
«Logo sempre volvo a ti, que lle den ós demais /
Vou deixar de rapear porque xa son o seu pai /
E de dar tantas palizas xa non me parece guai /
Vou regresar ao futuro como Marty McFly»
Non faltan no tema as chiscadelas a Compostela. É máis, ‘A feira das mentiras’ conta cun videoclip desenvolvido por Álvaro Alvite no que percorremos, durante a noite e xunto a Boyanka Kostova, escenarios moi recoñecidos de Santiago.
‘A feira das mentiras’ é a reiteración de que a versatilidade de Boyanka Kostova non ten límites. A confirmación de que o dúo santiagués ha traballado no novo álbum baixo a máxima da diversión, coa enerxía de permitirse fluír para experimentar e seguir crecendo. Unha diversión tan palpable nos seus adiantos, como contaxiosa. ‘A feira das mentiras’ é outro tema de Boyanka Kostova capaz de hipnotizar, e só queda deixarse arrastrar.
PRÓXIMAS DATAS
· 15/04 · PONTEVEDRA (Arte e Parte) ·
· 22/04 · A CORUÑA (IsTmo Fest)
· 29/04 · ORDES (Festa do Champiñón)
· 22/09 · VIGO (TerraCeo)
