%20en%20Threads3.png){kind=small}
Inés Rey destaca o interese das aeroliñas e a importancia de que A
Coruña volva contar con conexións internacionais
A Coruña, 12 de novembro de 2021.- A alcaldesa da Coruña, Inés Rey confirmou o
interese das compañías aéreas por participar no concurso aberto polo Concello para
a promoción do tráfico de pasaxeiros turístico e de negocios na cidade, adiantando a
presentación de propostas para operar Londres, París, Valencia, Málaga e Gran
Canaria.
A alcaldesa lembrou a necesidade de esperar ao desenvolvemento de todo o trámite
administrativo para poder confirmar oficialmente a posta en marcha dos novos
destinos mais destacou a importancia de “ter conseguido que A Coruña esperte de
novo o interese das compañías aéreas e que se volvan a conseguir conexións
internacionais directas”. De confirmarse estas propostas, A Coruña tería tres novas
conexións nacionais e tres internacionais que en palabras da alcaldesa “permitirán
comezar a situar a cidade e o aeroporto de Alvedro no lugar que lles corresponde”.
O obxectivo do concurso de promoción turística posto en marcha polo Concello é
aumentar as liñas e frecuencias coas que conta o aeroporto, atraer visitantes e dotalos
de mellores conexións. O concurso público establece que as compañías deben ofertar
como mínimo dúas frecuencias semanais con Alvedro.
“Un destino turístico de primeiro nivel como A Coruña ten a obriga de potenciar o seu
papel no mapa turístico internacional e de potenciar tamén o seu aeroporto como
elemento motor esencial para a nosa economía”, sinalou Inés Rey.
“Esta promoción servirá para que A Coruña teña visibilidade en mercados cun gran
número de visitantes potenciais que buscan destinos turísticos como o noso, mais
servirá tamén para potenciar a economía local e promover a actividade empresarial
facilitando os traslados e os desprazamentos tanto ao resto de España como aos
destinos internacionais”, apuntou Inés Rey.
