%20en%20Threads3.png){kind=small}
A alcaldesa, Inés Rey, destacou que este ano o tradicional acendido
navideño será “unha homenaxe a todas e todos os que traballaron
garantindo os servizos esenciais da nosa cidade mentres estabamos na
casa seguros”
A Coruña, 3 de decembro de 2020.-
O Concello retransmitirá mañá o tradicional acendido
de Nadal en streaming para que todas as coruñesas e coruñeses poidan gozar do
pistoletazo de saída das festas sen necesidade de achegarse á praza de María Pita. Será
ás 19.30h e poderá seguirse a través do portal web municipal www.coruna.gal.
A alcaldesa, Inés Rey, destacou que este ano o acendido navideño será “unha homenaxe a
todas e todos os que traballaron garantindo os servizos esenciais da nosa cidade mentres
estabamos na casa seguros” e, asegurou, “este ano A Coruña vivirá un Nadal especial,
cargado de simbolismo e centrado nos barrios, en que lembraremos a todas as persoas que
faleceron neste fatídico 2020 e lles renderemos unha merecida homenaxe a todas as
persoas anónimas que nos coidaron durante o confinamento para mostrarlles o noso
agradecemento”. Honraremos, sinalou, o seu labor limpando e desinfectando as rúas, nos
supermercados, levándolles comida ás familias máis necesitadas, axudándolles ás nosas
persoas maiores, conducindo os buses que nos levaron aos nosos traballos, loitando contra
o virus nos hospitais... ás e aos bombeiros, policías e centos de voluntarias e voluntarios
que estiveron en primeira liña desde o minuto cero.
Por iso, todas esas persoas anónimas serán mañá as encargadas de darlle o pistoletazo de
saída ás nosas festas co tradicional acendido da iluminación do Nadal, unha iluminación
que chegará a todos os nosos barrios cunhas luces acolledoras e que terá o seu punto de
partida na praza de María Pita cun planetario que evocará o da Casa das Ciencias e que
nos trasladará a un ceo estrelado. Rey asegurou que “mañá haberá máis sorpresas en
María Pita” e destacou que durante o Nadal realizaranse espectáculos de animación polos
barrios en que se garantirán que non se produzan concentracións de xente.
A iluminación, explicou a rexedora, levará o espírito do Nadal a todos os barrios e servirá
para darlle vida ao comercio local e á hostalería. “Será un Nadal diferente, en que nos toca
quedarnos nos nosos barrios e consumir no comercio de proximidade”, apuntou a rexedora
que animou as coruñesas e os coruñeses a gozar da súa zona, “a vivir un Nadal atípico en
que o importante será coidar da saúde de todas e todos”.
