%20en%20Threads3.png){kind=small}
O concerto, aprazado na primavera por mor do confinamento, terá lugar o domingo 11 de outubro no Pazo da Ópera a partir das 20.30 horas e conta con entradas dispoñibles a través da plataforma www.ataquilla.com
A produción artística e executiva de Liberar as arterias é de Sés, quen acompañada de
guitarras, palmas e percursións rende homenaxe á poeta Luz Fandiño
A Coruña, 2 de outubro de 2020.-
María Xosé Silvar, Sés, regresa aos escenarios da Coruña
para presentar o seu último traballo, Liberar as arterias. O vindeiro domingo 11 de outubro, a
partir das 20.30 horas, dará a coñecer ante o público coruñés o seu sétimo álbum de estudio,
un disco cru e directo no que a cantareira advirte da carraxe e do rancor e chama a enfrontar a
realidade e a inxustiza con valentía e desde o empoderamento. Sempre desde abaixo cara á
cima, sempre desde o activismo cotiá.
Liberar as arterias, publicado antes do confinamento da primavera, é un traballo coidado, sen
interferencias, no que Sés non se separa da súa voz, porque ela é a súa voz: cantareira,
compositora e produtora -nesta ocasión artística e executiva-, Maria Xosé Silvar instálase na
idea de resistencia e de orgullo de seu. Guitarras, palmas e percusións acompañan e conviven
coa voz, carisma, discurso, composicións e arranxos dunha artista que segue a evolucionar en
cada un dos seus traballos.
A crenza na loita e na rabia pero nunha rabia puntual, xustificada e dominada, non
dominante, é a base da súa nova proposta. Quero sangrar as feridas para liberar as miñas
arterias. As verbas de Luz Fandiño agroman de principio a fin, en cada compás, en todas as
letras do disco, aínda que, desde a literalidade, só compartan título. Ao cabo, Liberar as
arterias é unha homenaxe á poeta, “un exemplo de vitalismo, valentía, insubmisión e
irreverencia” para a cantareira. O disco é unha mensaxe que entronca co concepto de
depuración que Fandiño propón e no que Sés se identifica de pleno neste traballo. “Creo na
lucidez, na sensatez, na aprendizaxe e na prudencia. Desde elas creo que se loita, se canta e
se vive mellor. Isto é Liberar as arterias: loita e reacción, si, pero desde o empoderamento, non
desde a submisión”, subliña Sés.
Así, a cantareira salienta a pertinencia de non caer na ira, na cegueira ou no dogmatismo “para
ser loitadoras vitalistas, máis fortes, máis potentes”. Para sermos A bala vendida. Cántao en
Espiñas sen rosas, en Trampa de odio ou A única señora, pezas dunha ducia de reflexións e
reivindicacións que conforman un álbum co que chama a lexitimar o enfado ante unha inxustiza
sempre que permita enfrontar os feitos con valentía, firmeza e asertividade. Nos palcos ou
debaixo dos mesmos, renunciando ao aplauso fácil e desde o activismo cotiá.
O vindeiro domingo 11 o público poderá gozar no Pazo da Ópera do contundente directo
dunha artista valente, perseverante e liberada, defensora da tradición musical e do activismo
cotiá. A cita, para a que aínda quedan entradas dispoñibles a través da plataforma web
www.ataquilla.com, comezará ás 20.30 horas.
SÉS
María Xosé Silvar, Sés, inicia no 2011 unha traxectoria musical imparable e de profunda
actividade creativa coa gravación do seu primeiro álbum, Admirando a condición. Dous anos
máis tarde, en xuño de 2013, presenta Co xenio destrozado no Teatro Teatro Principal de
Santiago de Compostela, no 2015 lanza Tronzar os valos e no mes de decembro do 2016 ve a
luz Opoñerse á extinción. Pero é no 2017 cando chega o punto de inflexión e decide retomar o
seu primeiro traballo para facer os arranxos que ela considera necesarios e explorar o seu
propio son. Este é o nacemento de Readmirando a condición. O seu sexto disco, Rabia ao
silencio, chega no 2019. É o preludio dun novo traballo no que a loita e a reacción fían un
relato ateigado de verdade, aprendizaxe e empoderamento: Liberar as arterias (2020).
