%20en%20Threads3.png){kind=small}
A Orquestra de Cámara Galega interpretará, xunto coa pianista Elisa D ́Auria e o
clarinetista Spyros Fakiolas, unha selección dos seus temas e dos autores que
sempre o acompañaron, como Jean Sibelius e Johan Sebastian Bach
A Coruña, 3 de xaneiro de 2020.- O Teatro Colón ofrecerá o 18 de xaneiro un
concerto homenaxe ao mestre Rogelio Groba no seu 90 aniversario, que estará
organizado polo concello coa colaboración da Xunta de Galicia, o Concello de
Ponteareas e a Fundación Groba, e en que a Orquestra de Cámara Galega
repasará algunhas das obras dun repertorio que, no caso do pontevedrés, chega ás
720 composicións, en que se abordan cuestións como a etnografía, a paisaxe e a
historia de Galicia. No recital, actuarán tamén a pianista italiana Elisa D’Auria e o
clarinetista grego Spyros Kakiolas para interpretaren dúas das súas últimas
creacións, “Soatiña”, estreada en Bruxelas en maio de 2019 e “Peculiaridades”, que
se tocou por vez primeira no Festival Groba de 2018.
Ademais, as persoas espectadoras desfrutarán doutros temas asinados por autores
que sempre o acompañaron como Jean Sibelius e Johan Sebastian Bach nunha
noite onde se tributará ao que máis partituras enxeñou neste país ata o momento
cun requien, 14 sinfonías, 19 concertos e oito micro-concertos, así como 13
cantatas, 8 suites, 2 ballets, obras para coro, música de cámara, piano só, orquestra
de cordas, banda sinfónica... das que moitas non viron a luz aínda. Rogelio Groba
foi tamén director da Orquestra Municipal da Coruña durante 23 anos e fundador da
Orquestra do Conservatorio Superior de Música da Coruña e da Orquestra de Cámara Municipal e combinou ao mesmo tempo a dirección do Conservatorio e a docencia en Harmonía e Composición. Autor de ensaios e libros, desde 2002 preside a Fundación Rogelio Groba, clasificada de Interese Cultural e de Interese Galego polo Goberno autonómico.
As entradas están á venda na plataforma eventbrite.es por 5 euros máis gastos de xestión e no propio despacho de billetes do auditorio.
