A Real Academia de Medicina e Cirurxía de Valladolid premia un traballo sobre o sistema inmunitario en persoas maiores de investigadores da UDC

A Coruña, 23 de xaneiro de 2020.- A investigadora Vanessa Valdiglesias, investigadora Beatriz Galindo e membro do grupo de investigación Diagnóstico Condutual e Molecular Aplicado á Saúde (DICOMOSA) da Universidade da Coruña, recolleu o pasado 17 de xaneiro o Premio do Colexio Oficial de Médicos de Valladolid outorgado pola Real Academia de Medicina e Cirurxía de Valladolid ao traballo “Papel do sistema inmunitario na fraxilidade en persoas maiores: desenvolvemento de novos biomarcadores”.

Este traballo recolle parte dun estudo realizado polo grupo DICOMOSA, en colaboración co Grupo de Investigación en Xerontoloxía (GIG), tamén da Universidade da Coruña, que afonda nos mecanismos inmunolóxicos subxacentes á fraxilidade nos adultos maiores. O síndrome de fraxilidade implica un estado de vulnerabilidade e un incremento do risco de aparición de efectos adversos para a saúde, incluíndo discapacidade, dependencia e mortalidade, mais pode ser retrasado ou incluso revertido no caso de ser identificado a tempo. É baixo esta premisa que o grupo DICOMOSA traballa nos últimos anos no estudo das bases biolóxicas da fraxilidade, co fin de atopar biomarcadores que poidan resultar de utilidade na detección temperá deste síndrome xeriátrico, o que facilitaría a implementación de medidas preventivas e terapias personalizadas que axuden a retrasar ou mesmo evitar a súa aparición.

O galardón foi entregado o pasado 17 de xaneiro no Acto de Inauguración do presente curso que tivo lugar na sé da Real Academia en Valladolid.