%20en%20Threads3.png){kind=small}
A conselleira de Política Social, Fabiola García, visitou hoxe a nova localización desta residencia que financiará e construirá a Fundación Amancio Ortega.
O Goberno galego solicita ao Concello a adaptación das condicións de cesión do antigo terreo para empregalo con outro equipamento público.
Este cambio non suporá ningún atraso na redacción dos proxectos básicos e de execución, polo que as obras comezarán no primeiro semestre de 2020.
A nova instalación ofrecerá 150 prazas públicas, equipamento de primeiro nivel e creará 140 novos postos de traballo.
A Coruña, 17 de decembro de 2019.- A conselleira de Política Social, Fabiola García, acompañada do delegado da Xunta na Coruña, Ovidio Rodeiro, visitou hoxe a nova localización do futuro centro integral de atención a persoas maiores na cidade herculina. O Goberno galego comprou a parcela na que ata hai uns meses funcionaba a escola infantil Virgen del Camen da Fundación Hermanos Tenreiro, onde se construirá a nova residencia pública financiada pola Fundación Amancio Ortega. Fabiola García sinalou que se trata dun terreo de maior superficie, 1600 metros cadrados máis, que poderán ser destinados á unha zona axardinada para os maiores e cunhas magníficas vistas á ría do Burgo.
Así mesmo, a conselleira de Política Social destacou que xa se solicitou a licenza de demolición do antigo edificio polo que este cambio de localización non suporá ningún atraso á hora de redactar os proxectos básicos e de execución. Fabiola García agradeceu ao concello a súa boa disposición con este proxecto e confía en que axilice os trámites para que a nova residencia sexa unha realidade canto antes.
A Administración autonómica tamén lle solicitou ao consistorio coruñés, no marco da lealdade institucional, a adaptación das condicións de cesión do antigo terreo para facela menos restritiva e que a Xunta poida empregala para calquera tipo de equipamento público. Desta maneira, o Goberno galego contará con dúas parcelas para reforzar as infraestruturas do Estado do Benestar na cidade herculina.
O novo centro que será financiado e construído pola Fundación Amancio Ortega, ofrecerá 150 novas prazas públicas na Coruña. Será ademais unha residencia de equipamento de primeiro nivel e permitirá a creación de máis de 140 novos emprego no sector dos coidados.
