DiversidArte, Festival das Artes Inclusivas, proxecta na Coruña 100 curtametraxes internacionais de temática social como parte fundamental do seu programa

Os traballos, que abordan as temáticas de perspectiva de xénero, diversidade sexual, diversidade funcional e exclusión social, foron seleccionados para formar parte do concurso a través dunha convocatoria que recibiu máis de 1100 traballos de 89 países diferentes

O festival, que celebra a súa cuarta edición do 16 de setembro ao 5 de outubro, levarase a cabo no CGAI, NORMAL, Afundación, Fundación Luis Seoane e Praza de María Pita na Coruña

‘Taigeto, Sueños y Normalidad’, outra das iniciativas promovidas pola Plataforma DiversidArte durante o primeiro semestre do ano -formada por unha exposición de fotografía colectiva, unha performance e a edición dun libro en formato accesible-  tamén forma parte dos contidos do festival

O grupo de música inclusiva Xerock Percusión (procedente de A Guarda) e o actor e cómico Quico Cadaval actuarán o sábado 21 de setembro na Praza María Pita 

Accións artísticas na rúa e a Gala Festival DiversidArte, onde se entregarán os premios do concurso DiversimaCine, completan a programación de DiversidArte, Festival das Artes Inclusivas, 2019

A Coruña, 11 de setembro de 2019 -. Diversidarte, Festival das Artes Inclusivas, que se celebrará na Coruña do 16 de setembro ao 5 de outubro, proxectará en diferentes espazos da cidade 100 curtametraxes de temática social como parte do seu concurso DiversimaCine e ven de presentar a súa programación, esta mañá, nun almorzo para xornalistas na sede de Afundación.

A convocatoria, dirixida a colectivos, ONGs, produtoras e persoas que se adican á realización audiovisual de calquera nacionalidade, cultura ou relixión, recibiu máis de 1100 traballos de 89 países diferentes e estableceu catro categorías -perspectiva de xénero, diversidade sexual, diversidade funcional e exclusión social- para seleccionar e agrupar os traballos que xa forman parte de DiversidArte 2019. Entre os países participantes están Reino Unido, Irán, Australia, México, Brasil, Italia, Arxentina, Colombia e Israel, por citar algúns. A obra gañadora de cada un destes bloques recibirá un premio de 250€.

A partir do próximo martes, 17 de setembro, comezan as proxeccións das curtametraxes que forman parte de DiversimaCine en diferentes espazos da cidade vinculados á cultura como son a sede de Afundación, o CGAI e NORMAL. As sesións, que estarán libres de barreiras arquitectónicas e de comunicación, contarán con proxeccións subtituladas e non serán aptas para todas as edades xa que poden conter imaxes con contido sexual e/ou violento. As obras gañadoras daranse a coñecer durante a Gala Festival DiversidArte que terá lugar o sábado 5 de outubro na Fundación Luis Seoane.

‘Taigeto, Sueños y Normalidad’ 
“Taigeto, Sueños y Normalidad”, unha das iniciativas nas que a Plataforma DiversidArte traballou durante o primeiro semestre do ano, é outro dos eixos principais da programación desta edición de DiversidArte, Festival das Artes Inclusivas. Partindo dunha perspectiva histórica e co obxectivo de transmitir unha mensaxe de inclusión de contribuir á eliminación de estereotipos, o proxecto consta dunha exposición de fotografía colectiva -que permanecerá aberta dende o 16 de setembro ao 5 de outubro  no centro comercial Marineda City- unha performance -que se representará o 21 de setembro na Praza María Pita- e un libro en formato accesible.

O proxecto contou coa participación de máis de sesenta persoas, pertencentes a nove entidades sociais: Fundación ADCOR (Fundación de Adultos Discapacitados de A Coruña), CAPD (Centro Asistencial para Personas con Determinadas Capacidades), ONCE (Organización Nacional de Ciegos Españoles), GRUMICO (Grupo de personas con Discapacidad de A Coruña), Liga Reumatolóxica Galega, ACCEM (ONG por las personas refugiadas y migrantes), ACLAD(Asociación Coruñesa de Lucha Contra la Drogodependencia), CASCO (Comité Antisida de A Coruña) e ALAS (Asociación pola Liberdade Afectiva da Coruña) son os colectivos que, baixo a coordinación da Plataforma DiversidArte, fixeron posible un resultado “dunha calidade e un gusto inmellorables” en palabras de Cristina de la Puente, directora de proxectos de Poten100mos. 

O nome da iniciativa deriva dos espartanos da antigua Grecia, que arroxaban ás persoas con discapacidade dende o Monte Taigeto para conseguir deste xeito que na súa civilización non existisen ás persoas diferentes.

Xornada ‘Estamos Artes de Todo’ na Praza María Pita

Como parte do festival, o sábado 21 de setembro a Praza María Pita acollerá unha xornada completa de arte inclusivo baixo o nome de ‘Estamos Artes de todo’. Ademais de representarse “Taigeto, Sueños y Normalidad”, por parte do grupo de expresión corporal DiversidArte, levaranse a cabo diferentes accións de arte na rúa. Cabe destacar a actuación do grupo de música inclusiva Xerock Percusión, procedente de A Guarda “que poderán disfrutar as persoas con dificultades auditivas gracias ao bucle magnético cedido por ACOPROS”, segundo informou Cristina de la Puente, e a performance de Quico Cadaval ‘O convalecente recibe’. Tamén formarán parte do programa deste día a máquina de ImpresiónArte de Milicia Gráfica, DJ Inclusivo Montxo Nucleus 6 e un experimento artístico sociolóxico no que, baixo o nome de ‘Pintura a Cegas’, tres artistas -Eduardo Albo, Eduardo Hermida e Vicky Casas Lage- poderán poñerse na pel dunha artista cega -Evelyne Amies de Vos- pintando con gafas especiais, cedidas pola ONCE, e compartir a experiencia co público que, a través da interacción, poderá comprobar como a Arte ven de dentro e supera as barreiras físicas coas que moitas persoas con diversidade funcional se atopan.

DiversidArte, Festival das Artes Inclusivas, conta co apoio do Concello de A Coruña, a Deputación Provincial de A Coruña e Caixabank Obra Social, a quen Cristina de la Puente quiso dedicar un especial agradecemento por “volver a crer en nós un ano máis”.

Plataforma DiversidArte é un dos proxectos principais da asociación sen ánimo de lucro Poten100mos, formada por un equipo de traballo profesional e multidisciplinar que traballa con grandes resultados polo desenvolvemento persoal e a inclusión sociolaboral de persoas en situación de vulnerabilidade física, psíquica e/ou social.